Ahmedi Divanı
Yaşar AKDOĞAN tarafından hazırlanan Ahmedi Divanından bir bölüm alt kısımda verilmiştir.
Dokümanın tamamı için tıklayın…
ZEYİLLER
1
Her nireye kim ider-isem nazar (Z1/1)
Sen görünürsin zihî nûr-ı basar
Senden artuh seni görür gözüm (Z1/2)
Bes neyi görsün dahı ehl-i nazar
Evvel âhir zâhir ü bâtın ol an (Z1/3)
Gayr olmadugına hüccet yiter
Dahı yirde ger ola-y-ıdı vücûd (Z1/4)
Küntü ve semcan ola-y-ıdı haber
Nûr ayruh cayn-ı şems ayruh diyen (Z1/5)
Kör-durur yoh anda görmekden eser
Gözgüdeki sûret-i nâzır hemîn (Z1/6)
Bir-durur iki görür anı beşer
Şahs sâye iki degül bir-durur (Z1/7)
Gökdekidür suda görinen kamer
Bir yüzi yüz gösterür yüz âyine (Z1/8)
Zâti birdür lîki çoh görür suver
Gör hayâl oynayanuñ lucbetlerin (Z1/9)
Dürlü dürlü nicesi gelür gider
Cümlesinüñ varlıgı ol aradan (Z1/10)
Ki_anda vahdetdür bilâ-şek mucteber
Ahmedî keşf itdi vahdet sırrını (Z1/11)
Gayb nûrın gören olur dîde-ver
2 Ünv.
Bahâr irdi yine ferhunde-demdür (Z2/1)
Çemen bülbül üninden pür-nagamdur
Sun iy sâkî mey-i kevser-mizâcı (Z2/2)
Bu demde kim cihân Bâg-ı İremdür
Meyüñ bil hürmetin câmı ögüt tut (Z2/3)
Ki bu hâk-i Key ü ol hûn-ı Cemdür
Bu dürlü yazular berg-i hazânda (Z2/4)
Ohursañ kamu tevhîde beyândur
Yazın yaprahda ayruhdur bu hattı (Z2/5)
Sen anı sanma kim bâd-ı hazândur
Ayâg al ele bu gün yarını ko (Z2/6)
Cihânı çün bilürsin ne cihândur
Bu gün vir Ahmedî dadını cömrüñ (Z2/7)
Ki yarın hâl n’olısar gümândur
Cihân bir dürr-i gevherdür gözüñden (Z2/8)
cAceb tabcuñ ne bahr-ı bî-kerândur
3 B.U
İçümde âteş ü gözümde nem var (Z3/1)
Cihânda huşk u terden dahı nem var
Vücûdum varlıgum kamusı sensin (Z3/2)
Çü sen varsın baña dahı ne hem-var
Baña- hûn-ı ciger hwân-ı ferahdur (Z3/3)
Nice ki_elüñde sinüñ câm-ı Cem var
Baña n’iderse itsün gözlerüñ kim (Z3/4)
Belâ var-ısa bende sabrı hem var
Irah senden oluram derd-ile zâr (Z3/5)
Lebüñde gerçi kim her derde em var
Emel çün saña bagladı cihânda (Z3/6)
Eyit dahı Ahmedîye ne elem var
4 B.U
Bu resme var mı bir mahbûb-hub u nâzük ü dil-ber (Z4/1)
Gözi ala yüzi lâle saçı reyhan boyı carcar
Degül alnuñ-ıla zülfüñ lebüñ ü yañaguñ misli (Z4/2)
Meh-i bedr ü şeb-i kadr ü mey-i sâfî gül-i ahmer
Melekler hûr u ins ü cin ruh u zülf ü leb ü gamzeñ (Z4/3)
Görüben oldılar hayrân u zâr u vâlih ü muztar
Bu ne macnî bu ne sûret bu ne âyet bu ne sûre (Z4/4)
Teni fecr ü saçı leyl ü yüzi şems ü lebi kevser
Yañaguñla cebînüñde dahı zülf ü gözüñde_olmış (Z4/5)
¥iyâ rûşen safâ zâhir cefâmut gam canâ muzmer
Letâfetde leb ü dendân u hatt u hâlüñ olmışdur (Z4/6)
Biri lacl ü biri lü’l biri müşg ü biri canber
Yañaguñ agzuñ u dişüñ tutaguñ vasfı-la olur (Z4/7)
Beyân rengîn ü söz şîrîn cibâret hûb u macnâ ter
Hevân u mihrüñ ü cışkuñ vefâñ olmış-durur baña (Z4/8)
Ten ü cân u reg ü kan u dil ü dîn-ile cakl u ser
Diyem cevr ü cefâ vü derdi ü kahruña ki sabr-ıla (Z4/9)
Ola kan müşg ü katre dür taşı yâkût u yâ şekker
Firâkuñda tenüm cânum kanum u yüregüm olmış (Z4/10)
Biri hâk ü biri bâd u biri âb u biri âzer
Gözüñ gamzeñ saçuñ zülfüñ belâsı-y-ıla olmışdur (Z4/11)
Göñül mahzûn ciger pür-hûn gözüm Ceyhûn kadüm çenber
N’ola hicrüñde ger yanam eriyem göyinem söynem (Z4/12)
Ki ten cûd oldı cân şemc ü ciger kânûn yüzüñ micmer
Lebüñüñ fikr ü zikri dahı şavkı Ahmedînüñ uş (Z4/13)
Revân itdi sözin pâk latîf ü hûb u cân-perver
Sözi zülfüñ lebüñ yüzüñ dişüñ oldugı-çun toldı (Z4/14)
Meşâm uş müşg agzında basar nûr u kulah gevher
Degül ayruh bigi_evvel nazm u nesr ü lafz u macnîde (Z4/15)
Beyân kâsır zebân fâtir cibâret künd dehen ebter
5 B.U
Egerçi Yûsuf-ı Mısrî kamu güzelden aclâdur (Z5/1)
Senüñ hüsnüñ bu gün andan hezârân dürlü evlâdur
Yañaguñ alını gör kim ne âl itmiş-durur Hâlik (Z5/2)
Döker birbirinüñ kanın işigüñ katı gavgadur
Namâz-durur u tesbîh baña cışkuñ-durur iy şâhum (Z5/3)
Kaşun mihrâbına tapmah bu gün zühd-ile takvâdur
Hatâdur dir-ise zâhid benüm efgânuma gelsün (Z5/4)
Ohusın hattı yüzüñde yazılmış aña fetvâdur
Vefâ ummag-ıla cömrüm geçiser zâyic iy dil-ber (Z5/5)
Visâlüñden baña hâsıl hemân rûz-ı temennâdur
Cefâyı başdan aşurma senüñ-ıçun rahm it (Z5/6)
Egerçi kim vefâ kılmah cemâl ıssına kaydadur
Olurdı Ahmedî cânâ seni avlaya halvetde (Z5/7)
Göñül eydür aña dek dur saña bu sad-ı cankâdur
6 B.U
İy sanem sevdâ-yı cışkuñ göñlümi gam-gîn ider (Z6/1)
Bagruma zahm urmaga tîr-i hadengüñ kîn ider
Şâh öñinde ger piyâde olur-ısam gam degül (Z6/2)
Kim piyâle başa varsa şeh anı ferzîn ider
cÂlemi baştan başa pür-şûr u şer fitne kılur (Z6/3)
Her kaçan kim sihr-ile fettân kaşını çîn ider
Lâle bigi bagruma ben nice tag urmayayım (Z6/4)
Kraşumuzda müddecîler sohbetin tezyîn ider
Nideyim kılmaz terahhum baña ol gonca-leb (Z6/5)
Ebr-i nîsân bigi uşda gözlerüm nem-gîn ider
Bilmezem nedür günâhum şol kara gözüñe kim (Z6/6)
Cânumı aldı göñülden uşda kasd-ı dîn ider
Tutaguñdan dökilün kand-ı mükerrer dil-ber (Z6/7)
Her kaçan kim leblerüñüñ Ahmedî şerhîn ider
7 B.U
Senden banâ ne gelse dil-ârâm hoş gelür (Z7/1)
Ger cevr ger tekellüf ü ikrâm hoş gelür
Agyâr elinden Âb-ı Hayât agudur baña (Z7/2)
Yârum sunarsa zehr tolu câm hoş gelür
Nâmûs u neng ü cârı kamu bir yaña kodum (Z7/3)
Bildüm saña ki câşık-ı bed-nâm hoş gelür
Mecmûc-ı hüsnüñi zihi virmiş Çalab saña (Z7/4)
Her lahza bahdugumca ki baham hoş gelür
cIşkuñ rümûzı çünki yazıla bu göñüle (Z7/5)
Evrâk-ı defteri oda yaham hoş gelür
Bî-çâre Ahmedî tudagundan zekât umar (Z7/6)
Zîrâ hemîşe kullara incâm hoş gelür
8 Ünv.
Yine sevdâyı göñül bir zülfe itmişdür heves (Z8/1)
Kim hevâsında olur bâd-ı sabâ müşgîn-nefes
Ben mi laclüñde vü yâhûd mahl-bendi hüsnüñüñ (Z8/2)
Şekkerîn-hurmâya düzmiş müşg ü canberdür meges
Hüsn-i Şîrîn gül-şen-i cân-bahş-iken takdîri gör (Z8/3)
Anda Husrev gül-durur Ferhâd-ı miskîn hâr ü has
Âh kim bir kebkebe saldum göñül şeh-bâzını (Z8/4)
Bulımazam gerçi nâlemden dahupdur dem ceres
Müddecîlerden sahınsam şicrümi cayb itme kîm (Z8/5)
Şerbetüñ olmaz safâsı üstine üşse meges
Nâye didüm yâr elinden halka feryâd eyleme (Z8/6)
Diñmesüñ zârılıgı anuñ ki tutmadı nefes
Ol ki tañ yili şeb-i zülfinde olur müşg-bîz (Z8/7)
Tañ mı ben anuñ hevâ-yı kaddine itsem heves
Ahmedî şîrîn gözüñdür düşüren hicrnuña (Z8/8)
Tûtiyi güftârıdur iden giriftâr-ı kafes
9 B.U
Banâ hışm eyleyüben agladur ol yâr dirîg (Z9/1)
Agladugum görüben şâd olur agyâr dirîg
Kirpügüñ birle gözüñ yenge bir oldugı sebeb (Z9/2)
Bu ki cân kasdın ider ol ki cayyâr dirîg
Dâm-ı zülf-i siyehüñ hâlüñle gördügi-y-içün (Z9/3)
Mürg-i dil düşdi anuñ bendine kim aglar dirîg
Yine cân bülbülinüñ eyledügi nâle vü âh (Z9/4)
Bu ki kurb oldı anuñ güllerine hâr dirîg
Eyledi Ahmediyi künc-i melâmetde esîr (Z9/5)
Gelmedüñ görmege iy şûh-ı sitem-kâr dirîg
10 B.U
Şâhâ müselsel zülfüñüñ cışkında mecnûn olmışam (Z10/1)
Göñlümi bir sevdâ-y-ıçun dâm-ı belâya salmışam
Cânum seni kılur heves sensüz olımaz bir nefes (Z10/2)
Ben bu cihânuñ dahı pes bir râhatına kalmışam
Bir sâcatinde gicenüñ ârâm yohdur bende çün (Z10/3)
Zülfi kohusın dil-berüñ bâd-ı seherden almışam
İy hulkı hoş hüsni hasen sürme tapuñdan beni sen (Z10/4)
Zîrâ ki kullıguña ben yüz ragbet-ile gelmişem
Dirler baña kim Ahmedî bed-nâm u bî-câr olmagıl (Z10/5)
Ben nâm u nengüñ şîşesin çohdan ki taşa çalmışam
11
Şol gümüş barmahlaruñdan sun berü câm içelüm (Z11/1)
Çünkü âhır ölürüz bârî ser-encâm içelüm
Niceler içmez bu gün dünyâ anı bir gün içer (Z11/2)
Çün cömür bir sâcat-imiş bâri eyyâm içelüm
Niceler hasret geçiser macşukına irmez eli (Z11/3)
Hele ben yârum ile hoş şâd u hoş kâm içelüm
Sûfinüñ zühdine bahma fâsikuñ fıskına hem (Z11/4)
Allahuñ adı Kerîmdür gel dil-ârâm içelüm
Ahmedînüñ maksûdı çün yâr-idi girdi ele (Z11/5)
Turmayalum bir sacât her subh ahşam içelüm
12 B.U
Kaçan cîş eylesem sensüz olur nûşum dem-â-dem dem (Z12/1)
Anuñ-çun oldı gözümden revân hicrüñde her dem dem
Nite kim şemc-i hicrüñde erirem yanuban oda (Z12/2)
Ne dirlik ol kişiye kim aña oldı mukassem sem
Yañaguñ laclüñ üstinde añaram derleri dürrin (Z12/3)
Seherde çün görem düşmiş gülüñ üstine şeb-nem nem
Muzâcaf olalı cevri bu nergis gözüñüñ cânâ (Z12/4)
Müşeyyed surh bigi uş içümde oldı müdgam gam
Saçuñ reyhânına cândan olupdur cân u dil hayrân (Z12/5)
cAceb mi ola bu gamden benefşe bigi erham ham
Kaşuñ mihrâbına cândan kıluram secde k’olmışdur (Z12/6)
Kapuñ Kacbe yüzüñ Kıble saçuñ macşer lebü zemzem
Benüm bu derdüme dermân ola mı çeşme-i hayvân (Z12/7)
Şifâ bu ki eydesin aña tudagum-durur uş em em
Bu hicrüñ derdine dârû bulınmadı vü hem efsûn (Z12/8)
Bu gamzen zahmına dermân bulınmadı vü merhem
Ko yarına bu gün iç sen k’açılmışdur gül ü lâle (Z12/9)
İnanma çarha kim degül anuñ bünyâdı muhkem kem
Saña bu çarh dem virdi inanma sun berü câmı (Z12/10)
Ki fırsat var-iken hoş hoş sürelüm bu iki dem dem
Visâlüñ bahrına gavvâs olupdur Ahmedî talup (Z12/11)
cAceb mi kim ider-ise gözini ol mukayyen yemm
13 B.U
Câna yitdi zulme (sen) dâd eyle kurbân oldugum (Z13/1)
Hâtırı şimden girü şâd eyle kurbân oldugum
Çeşm-i mestüñ zulmı-y-ıla mülk-i dil vîrânedür (Z13/2)
cAdlüñ-ile anı âbâd eyle kurbân oldugum
Bendeñem biñ cân-ıla ölince lîkin bir nefes (Z13/3)
Bend-i gamdan cânı âzâd eyle kurbân oldugum
Cân ilini cevrüñ-ile nicesi kılduñ harâb (Z13/4)
Vaktidür ihsâna bünyâd eyle kurbân oldugum
Kaşlaruñ meyline kurbân itmege meyl idicek (Z13/5)
Ahmedîyi lütf idüp yâd eyle kurbân oldugum
14 B.U
Müşgîn saçuñı dir koma kim ol cemâle düşmesün (Z14/1)
Yacnî kamer tolunuban güneş zevâle düşmesün
cAkl ol ki sözde kıl yarar kıl dir-ise ger bilüñe (Z14/2)
Anca nazar kılmış kişi anuñla kâle düşmesün
Vasluñ senüñ sîmürg-ile hem kîmiyâdur bî-gümân (Z14/3)
Bulmayısardur vâsluñı fikr-i muhâle düşmesün
Ger meyli düşse dem-be-dem laclüñe cânumuñ ne tañ (Z14/4)
Siñek mükerrer nicesi kand-ıla bala düşmesün
Gül vakti geldi uş geçürgil hoş geçer dem şöyle kim (Z14/5)
Bu devr içinde lâle-veş elden piyâle düşmesün
Saçuñ kimesne eline girmez meger kim şânenüñ (Z14/6)
Sevdâ-yı hâm-ebdâna diñ uzun hayâle düşmesün
Dehhâni laclüñ vasfına dür dökdi gelsün Ahmedî (Z14/7)
Alsun cevâbın şicrinüñ ayruh hayâle düşmesün
15 Ünv.
Eger hicri kalursa bir karâra (Z15/1)
İçüm lâle bigi yana karar
Karâr itmeye ol göñül ki anda (Z15/2)
Firâkun odı düşüben karara
Gözüñ kim başuma tûfân saldı (Z15/3)
Dahı nide baña ol bahtı kara
Niçe döysün ciger kim şemc bigi (Z15/4)
Erir âhum odından seng-i hara
Yürege yara urdı gamzeñ ohı (Z15/5)
Ne vakt oñılısar Yâ-Rab bu yara
Gözümüñ yaşı gül yüzüñden ayru (Z15/6)
Cihânı beñzedüpdür lâle-zâra
Bu derde sabr eyle Ahmedî kim (Z15/7)
Müdârâdur hemân takdîre çâre
16 Ünv.
Şu kim Yûsuf bigi çekdi belâ-yı câme Kencâne (Z16/1)
Yiridür ola ol Mısruñ cAzîzi belki sultânı
Zihî câşık ki macşukuñ yolında mûr olam diyü (Z16/2)
Hevâ yolına virmişdür nice mühr-i Süleymânı
Nigârâ tâze laclüñi Hudâ lutfı-y-ıla ter tutsun (Z16/3)
Revân olduhça câlemde şehîddür gamzeñüñ kanı
Uşanmaz tîg-i gamzeñden göñül agzuña cânum dir (Z16/4)
Gör ol miskîni havf itmez meger kim yoh-durur cânı
Hemîşe nakşını göñülde mîmüñ Ahmedî hıfz it (Z16/5)
Meger beñzetdi bu bî-dil dehan-ı dil-bere anı
17 B.U
Olalıdan bu göñül kişverine şâhcAlî (Z17/1)
Zulm ider cadli koyup kullarına vâh cAlî
Gül yüzüñ câşıkuña pîç idüben eyleme dûr (Z17/2)
Ki ider bülbül-i dil hasret-ile âh cAlî
Agladugum bu-durur hüzn-ile Yackûb bigi (Z17/3)
Ki_itdi dil Yûsufına gabgabını çâh cAlî
Yüzüñ üzre sanemâ zülfüñi tagıtmayı gör (Z17/4)
Ki sehâb ugrayıcah tutılısar mâh cAlİ
Câm-ı laclüñ ele al sun berü toldur tâ-müdâm (Z17/5)
Ahmedîye çü nasîb eyledi Allâh cAlî
18 B.U
Böyle şîrîn tutaguñ iy cacebâ cân ola mı (Z18/1)
Yâ leb-i kevser ü yâ çeşme-i hayvân ola mı
Derd-mend itdi beni fitne gözüñ cişveleri (Z18/2)
Tutaguñdan cacebâ derdüme dermân ola mı
Gözlerüñden diler-imiş ki emân bula göñül (Z18/3)
Kimseye rahm itdügi zâlimler imkân ola mı
.................................................................. (Z18/4)
Bu beyit metinde yazılmamıştır.
..................................................................
Şol müselsel saçunuñ bendine düşenlerden (Z18/5)
Ahmedî bigi caceb kimse perîşân ola mı
Dokümanın tamamı için tıklayın… |